बैतडीमा जन्ती बोकेको बस दुर्घटना: मृतक संख्या १३ पुग्यो

समाचार

गृहपृष्ठ
समाचार

बैतडीमा जन्ती बोकेको बस दुर्घटना: मृतक संख्या १३ पुग्यो

NEWS24 KHABAR शुक्रबार, माघ २३, २०८२

सुदूरपश्चिम प्रदेशको बैतडी जिल्लामा बिहीवार राति जन्ती बोकेको बस दुर्घटना हुँदा ज्यान गुमाउनेको संख्या १३ पुगेको छ।
प्रहरीका अनुसार घटनास्थलमै आठ जनाको मृत्यु भएको थियो भने गम्भीर घाइते पाँच जनाको उपचारका लागि अस्पताल लैजाँदै गर्दा बाटोमै ज्यान गएको हो। उक्त तथ्यलाई सुदूरपश्चिम प्रदेश प्रहरी कार्यालय का प्रवक्ता एसएसपी पदमबहादुर विष्टले पुष्टि गर्नुभएको छ।
दुर्घटनामा परेर करिब तीन दर्जन यात्रु घाइते भएका छन्। घाइतेहरूको डडेलधुरा सहितका विभिन्न अस्पतालमा उपचार भइरहेको छ। स्थानीय स्रोतका अनुसार केही घाइतेको अवस्था गम्भीर छ।
पुर्चौडी नगरपालिका–७ भवनेबाट जन्ती लिएर बझाङ जिल्लाको सुनकुडातर्फ जाँदै गरेको सुप प्र ०२००१ ख १११९ नम्बरको बस पुर्चौडी नगरपालिका–७ बडगाउँस्थित मोडमा राति करिब ८ बजेतिर दुर्घटनामा परेको हो। प्रहरीका अनुसार बस सडकबाट करिब १५० मिटर तल खसेको थियो।
दुर्घटनाको कारणबारे प्रारम्भिक अनुसन्धान जारी रहेको प्रहरीले जनाएको छ। अँध्यारो, घुमाउरो सडक र सम्भावित तीव्र गतिलगायत कारणको अध्ययन भइरहेको छ। स्थानीय प्रशासन र सुरक्षाकर्मीले उद्धार कार्य पूरा गरिसकेका छन् भने मृतक र घाइतेको पहिचान गर्ने प्रक्रिया पनि अघि बढाइएको छ।

प्रकाशित मिति: शुक्रबार, माघ २३, २०८२

प्रतिक्रिया दिनुहोस्